ఐరాస సారధ్యంలో ఉగ్రవాద వ్యతిరేక దళం : కలాం

న్యూఢిల్లీ, జనవరి 17 : ఉగ్రవాదాన్ని సమర్ధవంతంగా ఎదుర్కోవడానికి ఐక్యరాజ్యసమితి నేతృత్వంలో తీవ్రవాద వ్యతిరేక దళాన్ని ఏర్పాటు చేయాలని మాజీ రాష్టప్రతి అబ్దుల్‌ కలాం సూచించారు. శుక్రవారం ఇక్కడ సుప్రీంకోర్టు న్యాయవాదులు ఏర్పాటు చేసిన ఒక కార్యక్రమంలో ఆయన మాట్లాడారు. దేశంలో ఉగ్రవాదాన్ని ఎదుర్కోవడానికి జాతీయ ఉద్యమంతో పాటు సంబంధిత కేసుల పరిష్కారానికి మరింత కఠినమైన చట్టాలను రూపొందించాలని కలాం అభిప్రాయపడ్డారు. చెడు శక్తులు అన్నీ ఏకమైనప్పుడు, మంచి మనసులు కూడా కలిసి పనిచేయాలని ఈ సందర్భంగా ఆయన సూచించారు. ఉగ్రవాదులను నిరోధించడానికి పలు దేశాలు సముద్ర, సైబర్‌ చట్టాల అమలుకు కలిసి పనిచేయాలని ఆయన పిలుపునిచ్చారు.